സുശാന്ത് സിങ്ങിന്റെ മരണത്തിന് മുമ്പുളള അവസാന മണിക്കൂറുകൾ ഇങ്ങനെ

യുവ ബോളിവുഡ് അഭിനേതാവ് സുശാന്ത് സിങ് രാജ്പുതിന്റെ മരണവാര്‍ത്ത കേട്ട ഞെട്ടലിലാണ് സിനിമാലോകവും ആരാധകരും. ഡാന്‍സ് ഷോകളിലൂടെയും സീരിയലുകളിലൂടെയും ജനപ്രിയനായ, കഠിനപരിശ്രമത്തിലൂടെ അവിടെ നിന്ന് സിനിമയുടെ അത്ഭുതലോകത്തേക്ക് ചേക്കേറിയ സുശാന്തിനെ ഞായറാഴ്ച ഉച്ചയോടെ സ്വന്തം ഫ്‌ലാറ്റിനുള്ളില്‍ തൂങ്ങിമരിച്ച നിലയില്‍ കണ്ടെത്തുകയായിരുന്നു.

മുംബൈയിലെ ബാന്ദ്രയിലെ ഫ്‌ളാറ്റിലാണ് സുശാന്ത് വാടകയ്ക്ക് താമസിച്ചിരുന്നത്. ഇവിടെ വച്ചാണ് സുശാന്ത് ആത്മഹത്യ ചെയ്തത്. എന്നാല്‍ മരണകാരണം ഇനിയും വ്യക്തമായിട്ടില്ല. കഴിഞ്ഞ ആറുമാസമായി ഈ യുവനടന്‍ ക്ലിനിക്കല്‍ ഡിപ്രഷന് ചികിത്സ തേടുകയായിരുന്നു എന്ന് പറയപ്പെടുന്നുണ്ട്.

സുശാന്തിന്റെ അവസാന നിമിഷങ്ങള്‍ ഇങ്ങനെയായിരുന്നു; രാവിലെ ആറരയോടെ ഉറക്കമുണര്‍ന്ന സുശാന്ത് ജോലിക്കാര്‍ കൊടുത്ത മാതളനാരകം ജ്യൂസ് കുടിച്ചു. ഒമ്പതുമണിയോടെ സഹോദരിയുമായി ഫോണില്‍ സംസാരിച്ചിരുന്നു. അതിനു ശേഷം തന്റെ കരിയറിന്റെ തുടക്കം മുതല്‍ പരിചയമുള്ള മഹേഷ് ഷെട്ടി എന്ന നടനുമായും ഫോണില്‍ സംസാരിച്ചിരുന്നു സുശാന്ത്.

‘കിസ് ദേശ് മേം ഹോഗാ മേരാ ദില്‍’ എന്ന സീരിയലില്‍ ഇരുവരും ഒരുമിച്ച് അഭിനയിച്ചിട്ടുണ്ട്. സുശാന്തിന്റെ അടുത്ത സ്‌നേഹിതനായിരുന്ന മഹേഷിനോടായിരുന്നു അദ്ദേഹത്തിന്റെ അവസാനത്തെ സംഭാഷണം. അതിനു ശേഷം മുറിക്കുള്ളില്‍ കയറി വാതിലടച്ചതാണ്.

പത്തുമണിയോടെ പ്രാതലിന് എന്തുവേണം എന്ന് ചോദിയ്ക്കാന്‍ വേണ്ടി കുക്ക് ചെന്ന് വാതില്‍ മുട്ടിയപ്പോള്‍ തുറന്നില്ല. രണ്ടുമൂന്നു മണിക്കൂര്‍ കഴിഞ്ഞും തുറക്കാതെ വന്നപ്പോള്‍ മാനേജരാണ് സുശാന്തിന്റെ സഹോദരിയെ വിളിച്ചു കാര്യം പറഞ്ഞത്. അവര്‍ ഉടന്‍ തന്നെ ഫ്‌ലാറ്റിലെത്തുകയും, മറ്റൊരു താക്കോല്‍ ഉണ്ടാക്കിച്ച് വാതില്‍ തുറപ്പിക്കുകയും ചെയ്തു. വാതില്‍ തുറന്നപ്പോള്‍ സുശാന്ത് ഫാനില്‍ നിന്ന് തൂങ്ങി നില്‍ക്കുന്ന ഞെട്ടിക്കുന്ന കാഴ്ചയാണ് അവരെല്ലാവരും കണ്ടത്.

തനിച്ചായിരുന്നില്ല സുശാന്ത് ഈ ഫ്‌ളാറ്റില്‍. ഒപ്പം അദ്ദേഹത്തിന്റെ ക്രിയേറ്റീവ് മാനേജര്‍, ഒരു സുഹൃത്ത്, വീട്ടുജോലി ചെയ്യുന്ന ആള്‍ എന്നിവര്‍ താമസമുണ്ടായിരുന്നു. ആ വീട്ടില്‍ താമസമുണ്ടായിരുന്ന ഒരാളും സുശാന്ത് ആത്മഹത്യ ചെയ്യുമെന്ന് പ്രതീക്ഷിച്ചിരുന്നില്ല. ആ പ്രഭാതം തങ്ങളുടെ പ്രിയസുഹൃത്തിന്റെ അവസാനത്തേതാകും എന്നാരും ധരിച്ചിരുന്നില്ല.